August 7, 2007

ကျွန်တော်နှင့်သူငယ်ချင်းများ (၁)

ဦးနှောက်ကို format ချချင်သူ


. . .ကွန်ပျူတာ third year တုန်းက အတန်းထဲမှာ ယောင်္ကျားလေး ကိုးယောက်ရှိပါတယ်။ သူငယ်ချင်းတွေက တစ်ယောက်တမျိုးစီ ထူးခြားတဲ့ အဖြစ်အပျက်လေးတွေ ကိုယ်စီရှိကြပါတယ်။ အဲဒီသူငယ်ချင်းတွေထဲက မောင်မောင် ဆိုတဲ့ သူငယ်ချင်းရဲ့ တကယ်ဖြစ်ခဲ့တဲ့ အကြောင်းလေးကို အရင်ဆုံး ပြောပြချင်ပါတယ်။ သူက အဝေးသင် နဲ့ ကွန်ပျူတာ ကျောင်းနှစ်ကျောင်းမှာ third year ကို တပြိုင်နက် တက်နေတယ်။ စာမေးပွဲဖြေခါနီး time table ထွက်လာတော့ အဝေးသင်ကစောပြီး ကွန်ပျူတာက လေးရက်လောက် နောက်ကျတယ်။ အဝေးသင်က အရင်ဖြေရမှာဆိုတော့ အဝေးသင်က စာတွေကို အရင်အရကျက်ပြီး ကွန်ပျူတာကစာတွေကို အနည်းအကျဉ်းသာကျက်နေတယ်။ ဒီလိုနဲ့ အဝေးသင်စာမေးပွဲကို အောင်မြင်စွာဖြေနိုင်သွားပါတယ်။ အဝေးသင် စာမေးပွဲပြီးနောက်နေ့ မနက်မှာ ကျွန်တော်တို့ သူငယ်ချင်းတွေ စာစုကျက်တဲ့ဆီကို ရောက်လာပြီး သူအရမ်းစိတ်ညစ်ကြောင်း ညက စာတွေ (ကွန်ပျူတာကစာ) ကျက်လို့မရကြောင်း ပြောပါတယ်။ ဘာဖြစ်လို့လဲမေးကြတော့ “ငါ့ဦးနှောက်ထဲမှာ ပြည့်နေပြီထင်တယ် delete လုပ်ဖို့လိုမလားမသိဘူး နောက်ကျက်တဲ့စာတွေ ခေါင်းထဲမ၀င်တော့ဘူး အရင်ကျက်ထားတဲ့စာတွေပဲ ပြန်ရနေတယ်” လို့ပြောပြီးပြန်သွားတယ်။ ညနေကြတော့ သူ ပြုံးဖြီးဖြီးနဲ့ ထပ်ရောက်လာတယ်။ ဘယ်ကလှည့်လာလဲ မေးတော့ စိတ်ရောဂါအထူးကုဆေးခန်းကပြန်လာတာ တဲ့ နောက်ပြီး ဆရာဝန်နဲ့တွေ့ခဲ့ပုံလေးကို ပြောပြပါတယ်။ သူဆေးခန်းရောက်တော့ ဆရာဝန်က ”ဘာလိုဖြစ်တာလဲ ဘယ်သူလဲ” မေးတော့ သူက ”ကျွန်တော်ဖြစ်တာပါ စာကျက်လို့မရလို့ပါ၊ အရင်တုန်းက ကျက်ထားတဲ့ စာတွေပဲ ခေါင်းထဲမှာ ရှိနေပြီး နောက်ထပ် ထပ်ထည့်လို့ မရတော့လို့ပါ၊ ခေါင်းတွေလဲပူနေတယ်၊ စိတ်ရောဂါများဖြစ်နေပြီလားလို့ပါဆရာ” လို့ ပြန်ဖြေတယ်။ ဒါနဲ့ဆရာဝန်က ” ကိုကိုယ်ကို စိတ်ရောဂါရှိတယ်ထင်ပြီး ဆေးခန်းလာပြနိုင်သေးရင် မင်းမရူးသေးပါဘူး၊ အိပ်ရေးပျက် ပင်ပန်းပြီး အားနည်းသွားလို့ပါ၊ စိတ်အေးအေး ထားပြီး အနားယူပါ” လို့ ပြောပြီး သောက်ဖို့ ဆေးတွေပေးလိုက်တယ်။ သူငယ်ချင်းတွေကို သူအိမ်ပြန်ခါနီးမှာ ”တော်သေးတယ်ကွ ငါ့ဦးနှောက်ကို format ချမိတော့မလို့” ဆိုပြီးပြောသွားတယ်။ ဒီလိုနဲ့ သူငယ်ချင်းတွေက သူ့ကိုနာမည်အသစ်ပေးလိုက်ကြတယ် ”ဦးနှောက်ကို format ချချင်သူ” လို့ - - - - -


0 comments:

မြန်မာစံတော်ချိန်

Calendar


Recent Comments