ဇနီးမောင်နှံများ

စကားများရန်ဖြစ်ကြသည့် ဇနီးမောင်နှံများ ရိုးမြေကျအောင် ပေါင်းသင်းကြရဆို

ဇနီးမောင်နှံများ အားလုံးစကားများ ရန်ဖြစ်ကြသည်မှာ အဆန်း တကြယ် မဟုတ်ပေ။ အချို့ ဇနီးမောင်နှံများဆိုလျှင် မကြာခဏ စကားများ ရန်ဖြစ်တတ်ကြသည်။ သို့သော်လည်း ဇနီးမောင်နှံ အများအပြားမှာ ပို၍စကားများ ရန်ဖြစ်ကြလေလေ ပို၍ရိုးမြေကျအောင် ပေါင်းသင်ကြလေလေ ဖြစ်ကြရာ ဘဝ တစ်သက်တာ ပေါင်းသင်းကြသော ဇနီးမောင်နှံများကို လေ့လာရန်မှာ အံ့သြစရာဖြစ်ဖွယ်ရှိသည်။

ဒေါသကို ချုပ်တည်းမျိုသိပ်ကြသော ဇနီးမောင်နှံများ၏ သေဆုံးနှုန်းသည် အိမ်ထောင်ဖက် တစ်ဦးထက်မနည်း သေဆုံးနှုန်းထက် နှစ်ဆမျှဖြစ်သည်ကို အမေရိကန်ပြည်ထောင်စု၌ ဇနီးမောင်နှံစုံတွဲ ၁၉၂ တွဲကို ၁၇ နှစ်ကြာလေ့လာ သိရှိခဲ့ရသည်ဟု ဆိုသည်။
အဓိကမှာ အချင်းများကြသည့်အခါ ထိုအချင်းများမှုကို မည်သို့ ဖြေရှင်းမည်ဆိုခြင်းဖြစ်သည်ဟု မီချီကန်တက္ကသိုလ် သုတေသန အဖွဲ့ခေါင်းဆောင် အန်းနက်စဟာဘာဂ်က ပြောဆိုသည်။ ဒေါသဖြစ်သည့်အခါ မျိုသိပ်မထားဘဲ ပေါက်ကွဲ ထွက်လိုက်ခြင်းသည် ကျန်းမားရေး အတွက်ကောင်းကြောင်းကို ထပ်မံလေ့လာ တွေ့ရှိခဲ့သည်ဟု သိရသည်။ ဒေါသကို ဖော်ထုတ်လိုက်သူ တစ်ဦးချင်းသည် အခြေအနေတစ်ရပ်အပေါ် ထိန်းချုပ်နိုင်သည့်အပြင် အခြေအနေကို အကောင်းရှုမြင် သုံးသပ်နိုင်သည်ဟု ဆိုသည်။

Read More...(ဆက်လက်ဖတ်ရန်)

Summary only...(အနှစ်ချုပ်သို့)

ဖြန့်ထွက်တွေးခြင်း

ကြားဖူးသော ပုံပြင်လေးတပုဒ်ရှိပါသည်။ မိန်းမလှလေးနှင့် ငွေချေးသူ ရဟူဒီ အဘိုးကြီး တစ်ယောက်အကြောင်းဖြစ်သည်။ မိန်းမလှလေး၏ အဖေမှာ ကုန်သည်တယောက် ဖြစ်သည်။ အဘိ်ုးကြီးဆီမှ ငွေချေး၍ ကုန်ကူးရာ ကုန်ရှုံးပြီး၊ ချေးငွေ မဆပ်နိုင်။ ရဟူဒီကြီးက မိန်းမလှလေးကို အကြွေးနှင့် သိမ်းချင်၍ ဥာဏ်ဆင်ပုံမှာ ကျောက်ခဲ အဖြူ အမဲ ရွေးချယ်ရမည်။
(၁) ကျောက်ခဲအဖြူရွေးနိုင်လျှင် အကြွေးလျော်မည်၊ ကောင်မလေးကို ဘာမှမလုပ်။
(၂) အမဲရွေးမိလျင် အကြွေးတော့လျော်မည်၊ ကောင်မလေးကတော့ သူ့ကိုယူရမည်။
(၃) ဘယ်ဟာမှ မရွေးဘဲ ခေါင်းမာလျှင်မူ ဖအေကြီးကို တရားစွဲ ထောင်ချမည်။ စသည်ဖြင့်ဖြစ်သည်။

ကောင်မလေးက ကျောက်ခဲရွေးပွဲ လုပ်ရန် သဘောတူလိုက်သည်။ ကျောက်ခဲ ရွေးပွဲမှာ ရဟုဒီကြီး၏ ဥယျာဉ်အတွင်း ကျောက်စရစ်ခင်းထားသော လမ်းပေါ်မှာ ဖြစ်သည်။ ရဟူဒီကြီးက အိတ်တစ်လုံးယူ၍ အလစ်မှာ ကျောက်ခဲ အမဲနှစ်လုံးကို အိတ်ထဲသို့ ထည့်လိုက်ပြီး “ ကဲ-ရွေးပေတော့” ဟု မိန်းမပျိုလေးကို ပြောသည်။ ကောင်မလေးက ရဟူဒီကြီး ကျောက်ခဲ အမဲနှစ်လုံးထည့်လိုက်တာကို မြင်လိုက်သည်။ ကောင်မလေး ဘာလုပ်မလဲ၊ စဉ်းစားကြည့်ပါ၊ သမားရိုးကျ တွေးရိုးတွေးစဉ် အတိုင်း ဆိုလျှင် ကောင်မလေး လွတ်လမ်းမရှိ။
ကောင်မလေး၌ ရွေးစရာ လမ်း (၃) သွယ် ရှိသည်။ (၁) ကျောက်ခဲ မရွေးတော့ ဟု ငြင်းမည်။ (၂) ကောင်မလေး ရဟူဒီကြီး မတရားပုံကို ဖေါ်ထုတ်မည်။ (၃) ကျောက်ခဲအမဲကို သိလျက်ရွေးလိုက်ပြီး ဖအေကြီးကို ကယ်တင်မည်။ ဘယ်လမ်းဖြစ်ဖြစ် မကောင်းပါ။
သာမန်အတွေးက ရွေးချယ်ခြင်း အပေါ်မှာ စဉ်းစားသည်။ ကောင်မလေးကတော့ ရွေးသော ကျောက်ခဲ အပေါ် မစဉ်းစား၊ အခြားတစ်ဘက်မှလှည့်၍ စဉ်းစားလေသည်။ ကျန်ရှိသော ကျောက်ခဲကို စဉ်းစားသည်။ ကောင်မလေးက အိတ်ထဲမှ ကျောက်ခဲကို ယူလိုက်ပြီး ခြေချော်လှဲလိုက်၍ လမ်းပေါ်မှ အခြားကျောက်ခဲများထဲသို့ ရော၍ အသာပစ်ချလိုက်သည်။ ရဟူဒီကြီးက အံ့အားသင့်၍ လက်ထဲမှ ကျောက်ခဲကို မေးသော အခါတွင်မူ “လက်ထဲမှာ ကျောက်ခဲမရှိတော့ဘူး၊ ဒါပေမယ့် ကိစ္စမရှိပါဘူး၊ အိတ်ထဲက ကျောက်ခဲကိုကြည့်ပေါ့။ အိတ်ထဲက ကျောက်ခဲက အမဲရောင်ဆိုရင် ကျွန်မရွေးတာ အဖြူပေ့ါ” ဟုဖြေလိုက်သည်။ လက်ထဲမှ ကျောက်ခဲကို ဗဟိုမပြုဘဲ ကျန်ရစ်မည့်ကျောက်ခဲကို ဦးတည်၍ တွေးသောကြောင့် အဘိုးကြီးလက်မှ လွတ်ရသည်။
မှတ်ချက်။ ။ ဒီပုံပြင်လေးကို ကျွန်တော်ငယ်ငယ်တုန်းက မကွေးမြို့တွင် ဆရာကြီး ဦးအောင်သင်း စာပေဟောပြောပွဲတွင် ပြောကြား၍ ကြားဖူးထားပါသည်။ ဆရာကြီးကလည်း တွေးပုံ၊တွေးနည်းတွေနဲ့ သေချာပြောပြတော့ အရမ်းနှစ်သက် သဘောကျခဲ့ပါသည်။ အခု တခါ ကိုတာရဲ့ ဖြန့်ထွက်တွေးခြင်း စာအုပ်မှာ ပြန်လည် ဖတ်မိသောကြောင့် တင်ပြလိုက်ရခြင်းဖြစ်ပါသည်။

Read More...(ဆက်လက်ဖတ်ရန်)

Summary only...(အနှစ်ချုပ်သို့)

တိတ်တခိုး

ပန်းတစ်ပွင့်ကို
အနမ်းလေး ခိုးပေးလိုက်ချင်တယ်။ ။
ဒါပေမယ့်
စိတ်ကူးနဲ့ မ၀ံ့မရဲသာ။ ။
တိတ်တခိုးနဲ့ အိပ်မက်တစ်ခုမှာ
ချိုမြိန်စွာ ချစ်ခွင့်ပန်
အနားတိုး ရှက်ပြုံးလေးထဲ
တော်တော်လေး ပျော်ဝင်မိပါရဲ့။ ။
ခုတော့...
ဟိုး အမြင့်ကပန်းကို
အခွင့်လမ်းမဲ့နေတာ
ငါ...ရင်ထဲ နာသလိုပဲ
သြော်... အကြိမ်ကြိမ်ပါပဲလေ
မ၀ံ့မရဲနဲ့ကိုး။ ။
မှတ်ချက်။ ။ဒီကဗျာလေးကို ညီငယ်သားဖြိုးက ကျွန်တော့ အတွက် အမှတ်တရ ရေးပေးထားခြင်းဖြစ်ပါသည်။

Read More...(ဆက်လက်ဖတ်ရန်)

Summary only...(အနှစ်ချုပ်သို့)

မန်းရွှေစက်တော်ဘုရား

ပထမ စေတီတော်

မန်းရွှေစက်တော်ဘုရားသည် မကွေးတိုင်း၊ မင်းဘူး(စကု)မြို့နယ် တွင်တည်ရှိပါသည်။ မင်းဘူးမြို့နှင့် (၃၂) မိုင် ကွာဝေးပါသည်။ (၁၀၈)ကွက် စက်လက္ခဏာနှင့် ပြည်စုံသော မြတ်ဗုဒ္ဓ၏ ခြေတော်ရာ အစစ်ဖြစ်သောကြောင့် စက်တော်ရာ ဘုရားဟုခေါ်တွင်ပြီး၊ မန်းချောင်းအနီးတွင် တည်ရှိသဖြင့် မန်းစက်တော်ရာ ဘုရားဟုခေါ်ပါသည်။ တနည်းအားဖြင့် မန်းရွှေစက်တော်ရာ ဘုရား ဟုခေါ်ကြပါသည်။
မန်းရွှေစက်တော်ရာ ဘုရားပွဲတော်ကို နှစ်စဉ်နှစ်တိုင်း တပိုတွဲလဆန်း (၅)နေ့တွင် စတင်ဖွင့် လှစ်ပီး မြန်မာနှစ်ဆန်း (၁)ရက် ထိ ကျင်းပပါသည်။
ဗုဒ္ဓဘုရားရှင်သည် စန္နကူးနံ့သာ ကျောင်းတော်ရာ သို့ သီတင်းသုံးရန်ကြွချီလာပါသည်။ မင်းဘူး စက္ကိန်းတဲဘုရားနေရာတွင် ကျိန်းစက်တော်မူ ခဲ့သောကြောင့် ထိုနေရာတွင် စက္ကိန်းတဲစေတီကို တည်ထားကိုးကွယ်ကြပါသည်။ ဘုရားရှင် ကျိန်းစက်တော်မူခဲ့သော မြသား သလွန်တော်ကို မကွေးဘက်မှ ဘီလူးညီနောက် လာရောက် တောင်းပန်ယူဆောင်ပီး မြသလွန်ကို ဌာပနာ၍ မကွေး ဘက်ကမ်းတွင် မြသလွန်စေတီတော်ကို တည်ထား ကိုးကွယ်ပါသည်။ အပြန်လမ်းတွင် မုဆိုးနှင့် နဂါးတို့တောင်းပန်သောကြောင့် အထက်စက်တော်ရာ နှင့် အောက်စက်တော်ရာ ခြေတော်ရာများကို ချထားတော် မူခဲ့ပါသည်။
မန်းစက်တော်ရာ ခြေတော်ရာများသည် ဘုရားရှင်ကိုယ်တော်တိုင် ချထားသော ခြေတော်ရာများဖြစ်သဖြင့် သွားရောက်ဖူးမျှော်သင့် သလိုပျော်ရွှင်စရာ ကောင်းသော အညာဒေသ၏ စိမ့်စမ်းရေ မန်းချောင်းတွင် ရေချိုးရသော အရသာကိုလည်း ခံစားကြည့်သင့်ပါသည်။ ဘုရားလည်းဖူးရ၊ ပျော်ရွှင်စွာရေလည်းကစားရ ရေချိုးလည်းရ၊ ဘေးမဲ့တောတွင်လည်း လှည့်လည်ကြည့်ရှု့၍ သဘာဝတော အရသာကို ခံစားနိုင်မည်ဖြစ်ပါသည်။
ယခုအခါ မကွေးတံတား (ဧရာဝတီတံတား) ကိုတည်ဆောက်ပီး ဖြစ်သောကြောင့် သွားရေးလာရေး လွယ်ကူသွားပါသည်။ အရင်တုန်းကလို အချိန်ကိုတွက်၍ သွားလာစရာ မလိုတော့ပါ။ သွားချင်ပြန်ချင်သော အချိန်တွင် သွားလာလို့ရနေပါသည်။
မန်းရွှေစက်တော်ဘုရားပွဲတော်သည် ဆောင်းအကုန် နွေအကူးတွင် ဖွင့်လှစ်သောကြောင့် ရာသီဥတု သာယာပါသည်။ သို့ပေမယ့် အညာဒေသရဲ့ ဖုန်များကတော့ ပြေးလွှားဆော့ ကစားနေကြပါပီ။ မင်းဘူးကနေ ရွှေစက်တော်ကိုသွားသောလမ်းသည် တောလမ်းဖြစ်သောကြောင့် လမ်းတလျှောက်တွင် ဖုန်များ များပြားနေပါသည်။ ပွဲတော်သို့ရောက်လျင် လူများနှင့် ကားများမှာ ဖုန်များဖြင့် ပြည့်နေပါသည်။ အဲလိုဖုန်များ ပြည့်သလို ပူလည်း ပူအိုက်သောကြောင့် မန်းချောင်းထဲ ဆင်းပီး ရေချိုးရသော အရသာသည် မည်သည့် အရာနှင့် မလဲနိုင်အောင် ခံစားကြရမည်ဖြစ်ပါသည်။ ရေချိုး အနားယူပြီးလို့ ဘုရားဖူးဖို့ တောင်ပေါ်ကိုခြေလျင် တက်ကြရပါသည်။ တောင်ပေါ်တွင် ဘုရားဖူး ရှု့ခင်းကြည့်၊ သဘာဝ ဘေးမဲ့တောကို လေ့လာနိုင်ကြပါသည်။ တောင်ပေါ်က မောမောပန်းပန်းနှင့် ဆင်းလာပြီးလျင်လည်း မန်းချောင်းထဲဆင်း၍ ရေချိုးနိုင်ပါသည်။ ဘုရားပွဲလာသူများသည် ဘုရားလည်း ရေလည်းချိုးကြရပါသည်။ တနေ့ ရေ ၂ ကြိမ်လောက် ချိုးသူများပါသည်။ တချို့ဆိုလျင် အကြိမ်ရေတော်တော်များများ ရေချိုးကြပါသည်။ မြန်မာပြည်အလယ်ပိုင်း အညာဒေသရဲ့ အပန်းဖြေ ကမ်းခြေလေး တခုဖွယ်ဖြစ်ပါသည်။ မန်းချောင်းရေကလည်း ဘယ်လောက်ပဲ ချိုးချိုး အအေးမိတယ် ဖျားတယ် မရှိပါဘူး။ မန်းစက်တော်ရာ ပတ်ဝန်းကျင်ဒေသတွင် ဖူးမျှော်စရာ စေတီများ၊ သွားလာစရာ လေ့လာစရာ နေရာများလည်း ပေါများပါသည်။ ပွဲတော်ကွင်းပြင်ကလည်း ကျယ်သောကြောင့် လူများစည်ကားသောလည်း သွားရေးလာရေး အဆင်ပြေပါသည်။ ထို့ကြောင့် ဘုရားရှင်ကိုယ်တော်တိုင် ကြွရောက်တော်မူ ခဲ့သော နေရာဖြစ်သည့်အပြင် ဘုရားရှင်ကိုယ်တော်တိုင် ချထားတော်မူသော ခြေတော်ရာ အစစ်များရှိသောကြောင့် လာရောက်ဖူးမျှော် သင့်သလို အညာဒေသ၏ ဖုန်များ၊ ပူအိုက်သော ရာသီဥတုနှင့် အဆင်ပြေအောင် ပျော်ရွှင်စွာရေကစား ရေချိုးနိုင်သော မန်းချောင်း ရှိသောကြောင့် မန်းရွှေစက်တော် ဘုရားပွဲတော်ကို တခါ တခေါက်တော့ဖြင့် ဘုရားဖူးရင်း၊ ရေကစားရင်း လာရောက်ခဲ့ဖို့ ဖိတ်ခေါ်အပ်ပါသည်။

ခြေတော်ရာ

အောက်စက်တော်ရာ ညရှုခင်း

ပျော်ရွှင်ဖွယ်ရေကစားနေကြပုံ

Read More...(ဆက်လက်ဖတ်ရန်)

Summary only...(အနှစ်ချုပ်သို့)

ဒါကိုမဖတ်ပါနဲ့

ဒါကိုမဖတ်ပါနဲ့

တို့ ကြိုပြောထားမယ်နော် ....

ဒါကို မဖတ်ပါနဲ့လို့ .....

မင်း အစက

ကျော်သွားမလို့ပဲ မဟုတ်လား .....

ဘာလို့လာပြီး ဖတ်နေတာလဲ .....

တော်တော့လေဗျာ

ဆက်ဖတ်နေရင်

သက်သက်အချိန်ကုန်တာပဲရှိမယ်

ဒီမှာတင်ရပ်မယ်ဆိုရင်

မင်း အချိန်ကုန်သက်သာမယ် ....

ဘယ်လိုလဲ ........

မတော်သေးဘူးလား .........

အခုဆိုရင်တစ်ဝက်နီးပါးတောင်ရောက်နေပြီ

မင်း ဆက်ဖတ်နေတုန်းပါလား............

တို့သိတယ်နော်..............

မင်းမဖတ်ဘဲ မနေနိုင်တော့ပါဘူး ......

ဘယ်လို.........နေနိုင်တယ် ဟုတ်လား ......

မနေနိုင်ပါဘူးတွေ့လား ..........

မင်း မှန်တယ် ..........

ဒါ ဆက်ဖတ်လို့

ဘာထူးလာမယ်ထင်လဲ. ..............

ဘာမှမထူးပါဘူး .............

နောက်ထပ်နည်းနည်းလေးဘဲ ကျန်တော့တယ် .........

မင်းကိုယ်ကိုယ်ကို

ထိန်းနိုင်တဲ့ စွမ်းအားရှိကြောင်း

ပြတဲ့အနေနဲ့ ရပ်လိုက်စမ်းပါ ....

မရပ်နိုင်ဘူးကြည့်

နောက်ဆုံး စာလုံးအထိရောက်အောင်

အချိန်ကုန်ခံဖတ်ပြီးမှရပ်မှာ

ဟုတ်တယ် မဟုတ်လား .........

စိတ်မကောင်း မဖြစ်ပါနဲ့ဗျာ .............

လူတိုင်း ဒီလိုပါပဲ ...............

ဟဲ ဟဲ ဟဲ ဟုတ်တယ်ဟုတ်

ဒီပို့စ်လေးက မေကိုရေးထားတာပါ မေကိုကို ဘလော့မှာ တင်ထားပြီးသားပါခင်ဗျာ ကျွန်တော့်ဘလော့မှာ ထပ်တင်ဖို့ ခွင့်ပြုပေးသော မေကို အားကျေးဇူးတင်ပါတယ်နော်

Read More...(ဆက်လက်ဖတ်ရန်)

Summary only...(အနှစ်ချုပ်သို့)

အနန္တ စေတနာရှင်

နံနက်ခင်းကျောင်းအတက်

ကျွတ်ကျွတ်ညံစီနေတဲ့
ပါးစပ်ခေါင်းလောင်းသံတွေ
ပျံ့လွင့်လျှံဖိတ်နေတဲ့ ကျောင်းခန်းနံရံကြား
မားမားရပ်တဲ့ တို့ အရှင်
ပျော်ရွှင်မှုတွေ အရှိန်သပ်ဖို့
သူ့တေးသံကို အထပ်ထပ်သီးကျူး . . . လို့
ပိုးမသေ တပည့်ဆိုးတွေက
အခန်းရဲ့ နောက်နားကပ်
တခွိခွိ တကျွိကျွိနဲ့ ကြိတ်ထိုး
စိတ်တပိုးတုံး ပုခုံးပေါ်တင်
နှင်တံရဲ့ စေစားချက်နဲ့
ဝေး၀ါးမှုကို တပ်မက်ကြတုန်းပေါ့ . . .
စာမေးတော့ ခေါင်းကုတ်
အဟုတ်ပဲစဉ်းစားနေသလို
ဟို ဟို သည်သည် မျက်စိကစား
စာတစ်လုံးမှ မကျက်မှတ်ခဲ့ကြတာ
ဒီကောင်တွေပါ . . . . . ဆရာ . . .
ကျောင်းမှန်မှန်တက် စာမခက်တဲ့
ကျောင်းပျက်ရက်တွေ
လက်ချိုးရေလည်း
အရေအတွက်က အနန္တမှာ
ကျောင်းပြေးတာလည်း
ဒီကောင်တွေပါပဲ . . . . . ဆရာ . . .
ကျောင်းပြေး စာမကျက်
ဘ၀အတွက် မရေရာ
သေချာမှုက နတ္ထိမှာ
ရှေ့ကို ဘယ်လိုဆက်ကြပလေ . . .
ဒီကောင်တွေ ရှေ့ရေး
မျှော်တွေးလို့ ထောက်ချင့်
နောက်ကို ဒီလိုမဖြစ်ရအောင်
သိပ်မိုက်တဲ့ ဒီကောင်ကြီးတွေကို
တီးလိုက်ပါ . . . . . ဆရာ . . .
နာသုံးနာပြဌာန်း
ဘ၀လမ်းတွေ
ဖြောင့်မက်ပေးလို့
စောင့်ကြပ်နေသူ
ဆရာတို့ရဲ့ အနန္တကျေးဇူး
အထူးပြောဖို့ မလို
ကျွန်တော်တို့ကျောင်းသားသက်
ဆရာတို့လက်မှာပျော်ခဲ့တာ
(အခုဆို)
ဆယ်စုနှစ် တစ်ခုတောင်
ကျော်ခဲ့ပါပြီ . . . . . ဆရာ . . .

ကျေးဇူးရှင် ဆရာတို့ရဲ့ အနှိုင်းမဲ့ စေတနာကို ဂုဏ်ပြုရေးဖွဲ့ပါသည်။
ကိုဒီး ရဲ့ ကဗျာလေးပါ။ ၂၀၀၀ ခုနှစ်က သူငယ်ချင်းများ စုစည်းထုတ်ထားသော နှလုံးသားဒိုင်ယာရီ ကဗျာစာအုပ်လေးမှ

Read More...(ဆက်လက်ဖတ်ရန်)

Summary only...(အနှစ်ချုပ်သို့)

အခန်းစိုး

အခန်းစိုးဆိုတာ ရွာအလှူတွေမှာ ဆေးလိပ်၊ လက်ဖက်၊ ဆန်၊ ဆီ၊ ကြက်သွန်၊ ငါးခြောက်၊ ၀က်သားအိုး စတာတွေကို ထိန်းသိမ်းစီမံ ပေးရတဲ့သူပါ။ အခန်းစိုးကို တချို့က အခန်းဆိုးလို့ နာမည်ပျက်နဲ့ ခေါ်တတ်ကြတယ်။ အလှူဒကာ၊ အလှူဒကာမတွေက လုံးဝဥဿုံ လွှဲအပ်ထားလို့ သူတို့ကိုယ်စား အပြောအဆိုခံလွတ်အောင်၊ မကုန်သင့်တာ မကုန်အောင်စီမံရ တဲ့လူမို့ တချို့က ‘ပိတ်ဒကာ‘ လို့ခေါ်တတ်ကြသေးတယ်။ သေရင်ပြိတ္တာဖြစ်မယ့် သူလို့လည်း မေတ္တာပို့သခြင်းခံရတယ်။
ဒါကြောင့် အလှူတွေမှာ အခန်းစိုးလုပ်ကိုင်ပေးမယ်သူ ရှားပါးတယ်။ တချို့က အလှူ ဒကာ၊ အလှူဒကာမနဲ့ ဆွေမျိုးတော်စပ်လို့ မလွှဲသာ၊ မရှောင်သာ လုပ်ကိုင်ပေးကြတယ်။ အခန်းစိုးက အလှူတစ်လှူ အစကနေအဆုံး လုပ်ကိုင်ရတာမို့ မိမိအလုပ်လည်းပျက်တယ်။ ပင်လည်းပင်းပန်းတယ်။
အလှူတစ်လှူမှာ အခန်းစိုးက ဆေးလိပ်လိပ်တဲ့နေ့ကစပြီး ရှင်မယ်ခံတဲ့နေ့အထိ နေကြ ရတယ်ဆိုတော့ နှစ်ပတ်လောက်ကြာတတ်တယ်။ အလှူမှာ တည်ခင်းဧည့်ခံဖို့၊ အလှူငွေထည့် ၀င်လာကြတဲ့သူတွေကို လက်ဆောင်ပြန်ဖို့ အလှူရက်မတိုင်မီ တစ်ပတ်ကျော်လောက်ကကြိုပြီး ပြောင်းဖူးဖက် ဆေးလိပ်တွေကို ထောင်ချီပြီး လိပ်ထားရတယ်။ ဆေးလိပ်ကို ဆေးလိပ်လိပ်တဲ့သူ တွေက အိမ်ဝေယျာဝစ္စ အားလပ်တဲ့အချိန် နေ့လယ်ခင်းမှာ တစ်လိပ်ပြီးပြီး၊ နှစ်လိပ်ပြီးပြီး လာရောက်ဝိုင်းဝန်း လိပ်ပေးကြတယ်။ ရွာမှာ ဆေးလိပ်မလိပ်တတ်တဲ့ အမျိုးသမီးလဲ မရှိဘူး။ အိမ်ထောင်ရှင် အမျိုးသမီးတိုင်း လိပ်တတ်ကြတယ်။ တချို့အရွယ်ရောက်တဲ့ မိန်းကလေးတွေ ဆေးလိပ်လိပ်သင်ရင် အိမ်ထောင်ပြုတော့မှာမို့လားလို့ စ,တတ်၊ ပြောင်တတ်ကြပါတယ်။
ဆေးလိပ်လိပ်တဲ့သူတွေ ကျွေးဖို့မွေးဖို့ အကြော်၊ ပေါက်ပေါက်ဆုပ်၊ ကြံသကာ၊ ကောက်ညင်းပေါင်း စတဲ့သရေစာ ထည့်ယူလာတဲ့ ပန်းကန်ထဲကို လက်ဖက်ထည့်ပေးပြီး တုံ့ပြန်တတ်တယ်။ လက်ဖက်သားနဲ့ ချင်းရောနယ်ထားတဲ့ အပေါ်ကို ပဲကြမ်းကြော် ဖြူးပေးလိုက် တာပါ။
အဲဒီမှာ လက်ဖက်သားကနည်းပြီး ချင်းများနေရင် အခန်းစိုးကို အပြစ်တင်ကြတယ်။ ဆီ ဆမ်းတာနည်းနေရင်လည်း ကဲ့ရဲ့တတ်ကြတယ်။ လက်ဖက်သားကများပြီး ချင်းနည်းနေမယ်၊ ဆီရွှဲနေမယ်ဆိုရင်လည်း အခန်းစိုးက သူ့ဟာမဟုတ်လို့ ဗုံးဗောလအော(အများအပြား)သုံးတယ် လို့ အပြောခံကြရပြန်ရော၊ အခန်းစိုးက အပြောခံ လွတ်ခဲလှပါတယ်။အလှူမှာ ဧည့်ခံကြရတဲ့သူ တွေက လက်ဖက်၊ ဆေးလိပ်လိုချင်ရင် အခန်းစိုးဆီ တောင်းကြရတယ်။ အိုးသူကြီးကလည်း ချက်တော့ပြုတ်တော့မယ် ဆိုရင် ဆန်၊ ဆီ၊ ငရုတ်၊ ကြက်သွန်၊ ငါးခြောက်တွေကို အခန်းစိုးဆီ က တောင်းရတယ်။ ဆွမ်းလောင်းဖို့ချက်ထားတဲ့ ၀က်သားဒယ်၊ ငါးခြောက်ဒယ်တွေကိုလည်း အခန်းစိုးဆီ ပြန်အပ်ထားကြရတယ်။ အခန်းစိုးက ပေးသင့်တယ်ထင်တဲ့ သူကိုပေးတယ်။ မေး မြန်းပြီးပေးသင့်သလောက်သာ ပေးတယ်။ တချို့က အလှူနဲ့မသက်ဆိုင်ဘဲ အရက်ဝိုင်းမှာ မြည်းဖို့ဆေးလိပ်၊ လက်ဖက်လာတောင်းတတ်တဲ့ သူတွေရှိတတ်တယ်။ တချို့က အရက်နဲ့လဲ သောက်ရအောင် ဆန်၊ ဆီ၊ ငါးခြောက်ကို မလိမ့်တပတ်နဲ့ တောင်းတတ်ကြသေးတယ်။ အခန်း စိုး မပါးနပ်လို့ ကုန်သွားတာတွေရှိတယ်။
အခန်းစိုးက အလှူမဏ္ဍပ်ဆောက်ပြီးတဲ့ အချိန်ကစပြီး ရှင်မယ်ခံတဲ့နေ့အထိ ငါးရက်လုံး လုံး မိမိအိမ်ကိုပြန်ပြီးတောင် မအိပ်ရတော့ဘူး။ အလှူအိမ်မှာ နေ့ရော၊ ညရော အခန်းထဲ အောင်းပြီး နေပေးရတော့တယ်။ အခန်းစိုးရေချိုးဖို့ ရေခပ်ပေးကြရတယ်။ လိမ်းဖို့သနပ်ခါးသွေး ပေးရတယ်။ ရှင်မယ်ခံပြီးတဲ့နေ့ ညနေပတ်စာခွာ၊ ဖျာသိမ်းမှ အလှူဒကာ၊ အလှူဒကာမတွေကို ကျန်ရှိတဲ့ပစ္စည်းတွေအပ်နှံ၊ အလှူကူတွေကို အပ်နှံပြီးမှ ပြန်ကြရတော့တယ်။
အလှူတွေက များသောအားဖြင့် အခန်းစိုးကို အင်္ကျီစလေးတစ်စ၊ ထဘီစလေးတစ်စ ၀ယ်ပေးကျေးဇူးတုံ့ပြန်တတ်ကြတယ်။ အခန်းစိုးအနေနဲ့ကတော့ ရရှိသည်ဖြစ်စေ၊ မရရှိသည်ဖြစ်စေ မျှော်ကိုးလုပ်ကိုင်တာတော့ မဟုတ်ပါဘူး။ စေတနာသက်သက်၊ အလှူမှာ ကုသိုလ်ယူဖို့ လုပ်ကိုင်ပေးကြတာပါ။
ကိုးကား ။ ။ ကိုလေးမြတ် မုံရွေးကြေးမုံသူ/သား (ကျေးလက်လူမှုသရုပ်ဖေါ် ရသစာစုများ)

Read More...(ဆက်လက်ဖတ်ရန်)

Summary only...(အနှစ်ချုပ်သို့)