December 7, 2007

ဟာသ(၁)

အချစ်စစ်ဆိုတာ

“တို့ကို တကယ်ချစ်ရဲ့လား”
“ချစ်တာပေါ့”
“ဒီလိုဆိုရင် တို့အတွက် အသက်အသေခံနိုင်ပါ့မလား”
“တို့အချစ်က မသေတဲ့ အချစ်မျိုးပါ”

Read More...(ဆက်လက်ဖတ်ရန်)

December 5, 2007

ကဗျာ(၁၁)

အချိန်ဆွဲဆန့်သူများ

အဲဒီနှုတ်ခမ်းတွေပေါ့
ကြည့်လိုက်ရင်
အမြဲတမ်း လှုပ်လှုပ်ရွရွနဲ့
သူတို့ ပါးစပ်က တစ်စုံတစ်ခုကို
မပီဝိုးတဝါးနဲ့
အထပ်ထပ်ရွတ်ဆိုနေသလိုပဲ . . .
“ ဘယ်လိုစကားလုံးတွေများပါလိမ့်” လို့
အသေအချာ နားစိုက်ကြည့်လိုက်တော့
x x x x x
အင်း . . . ဘာတဲ့ . . .
“ x x x x x ရရပါလို၏” ဟုတ်လား . . .
ဒီမယ် . . .
ခင်ဗျားတို့ကတော့
လူပီသလွန်းတာနဲ့ပဲ
လူကိုပြန်ဖြစ်ဦးမှာ . . .

သူငယ်ချင်း မင့်အိပ်မက်(ဆရာဝန်လေး) ရဲ့ ကဗျာလေးပါ
။ ၂၀၀၀ ခုနှစ်က သူငယ်ချင်းများ စုစည်းထုတ်ထားသော နှလုံးသားဒိုင်ယာရီ ကဗျာစာအုပ်လေးမှ

Read More...(ဆက်လက်ဖတ်ရန်)

December 2, 2007

အမေ့ထံသို့တမ်းချင်း

အမေ …
အမေ သားကို မနက်လေးနာရီလောက် မိုးထဲ လေထဲမှာ ခက်ခက်ခဲခဲ မွေးခဲ့တာ၊
သားငယ်ငယ်တုန်းက ချူချာလို့ ဂရုတစိုက်ပြုစု ယုယခဲ့တာတွေကို သားသိပါတယ်။
အရွယ်ရောက်လာတော့လည်း ဘာအလုပ်မှ မခိုင်းပဲ စာကိုကြိုးစားခိုင်းတာတွေ၊
ညီအကို မောင်နှမ တွေကြားထဲမှာ အားလုံးထက်ပိုပြီး ဦးစားပေးခဲ့တာတွေကို သိပါတယ် အမေ။
သားက ရွာသားဆိုပေမယ့် ရွာက အလုပ်တွေ ဘာမှ မလုပ်တတ်ပါဘူး။ လုပ်လည်း မလုပ်ဘူးဘူးလေ၊ အမေကမှ မခိုင်းခဲ့တာနော်။
သား စာကြည့်နေရင် အလုပ်ဘယ်လောက်များများ သားကို မခိုင်းပဲ အမေပဲ အပင်ပန်းခံပြီးလုပ်ခဲ့တယ်နော်။
သားက အမေ ပိုင်ဆိုင်တဲ့ လယ်တွေ၊ ကိုင်းတွေ ကို အကုန်မရောက်ဘူးဘူးအမေ။ အကုန်လုံးတောင် မသိခဲ့ပါဘူးအမေ။
အမေသာ မနက်လေးနာရီ ရွာဦးကျောင်းက တုန်းမောင်းခေါက်ပြီ်ဆို ထမင်း၊ ဟင်းချက် စတာတွေလုပ်ပြီး တောထဲကို သွားခဲ့တယ်နော်။

တခါတလေ အဖေါ်လိုပေမယ့် သားအိပ်ရေးပျက်မှာစိုးလို့၊ တောထဲလိုက်ရင် ပင်ပန်းမှာစိုးလို့ သားကို မခေါ်ပဲ အမေ တယောက်တည်းပဲသွားခဲ့တယ်နော်။
သား မြို့ကို ကျောင်းတက်ဖို့သွားတော့ မခွဲနိုင်ပေမယ့် သားဘဝအတွက်ဆိုပြီး အမေ့ မျက်ရည်တွေကို စတေးခဲ့တယ်နော်။
သားကိုတွေ့ချင်လို့ မြို့ကို လိုက်လာတော့လည်း (၂)မိုင်လောက် ဝေးတဲ့ ခရီးကို ဘာမှ မစီးပဲ ခြေလျင်လမ်းလျှောက်ခဲ့တယ်နော်။
သားအတွက်ပေးရမယ့် ပိုက်ဆံ နည်းသွားမှာ စိုးလို့ဆိုတာကို အဲဒီတုန်းက သားမသိခဲ့ဘူး အမေ။
အခုသိရတဲ့အချိန်မှာ သား မျက်ရည်ကျရပါတယ် အမေ။
အခုဆိုရင် သားက တက္ကသိုလ်တောင်ပြီးတော့မယ်နော် အမေ။
သား ကျောင်းကနေ အိမ်ကို ခဏပြန်တော့ မိသားစု အားလုံးက နွေးနွေးထွေးထွေး ကြိုဆိုကြတော့ သားတော်တော် ပျော်ပါတယ် အမေ။
ဒါပေမယ့် အိမ်က အလုပ်တွေက သားနဲ့ တစိမ်းတွေ ဖြစ်နေတယ် အမေ။
အဖေ လယ်ထွန်တဲ့ဆီ လိုက်မယ်လုပ်တော့ အဖေက “ မင်းမလုပ်တတ်ပါဘူး အိမ်မှာ နေခဲ့စမ်းပါ” တဲ့ အမေ။
အကို နဲ့ ပျိုးချတဲ့ဆီ လိုက်မယ် ဆိုတော့လည်း အကိုက “ မလိုက်ပါနဲ့ ညီလေးရာ တောထဲမှာက ပင်ပန်းတယ်ကွ မင်းမလုပ်နိုင်ပါဘူး” တဲ့လေ။
အမကလည်း “ မောင်လေးရာ ရွာရောက်တုန်း အေးအေးဆေးဆေးနေစမ်းပါ ဘုန်းကြီးကျောင်းသွားပြီး၊ ဘဘုန်းနဲ့ စကားသွားပြောနေ”တဲ့လေ။
အိမ်မှာဆို သားအလုပ်က သီချင်းနားထောင်တယ်၊ စာဖတ်တယ်၊ ဘုန်းကြီးကျောင်းသွားပြီး စကားစမြည် ပြောဆိုတယ် အမေ။
သားကျောင်းကို ပြန်မယ်ဆိုတော့ မိသားစု အားလုံး နေပူမရှောင်၊ မိုးရွာမရှောင် ပင်ပန်းစွာ လုပ်မှ ရတဲ့ သီးနှံတွေကို ရောင်းချပြီး သားကျောင်း စရိတ်ကို ပေးခဲ့တယ်နော်။
အမေက သားကို ဆုံးမ စကားတွေလည်း ပြောပေးခဲ့တယ်နော် အမေ။
အမေ သားကို စိတ်မပူရအောင် အမေ့ဆုံးမ စကားတွေကို သား အမြဲနားထောင်ပါတယ် အမေ။
အမေ ပြောတဲ့ အတိုင်း ဘယ်သူနဲ့မှ လည်း ခိုက်ရန် မဖြစ်ခဲ့ပါဘူး။ မူးယစ်ဆေးဝါး၊ အရက်သေစာ၊ လောင်းကစား မလုပ်ဖြစ်ပါဘူး အမေ။ ဘောလုံးပွဲတော့ကြည့်ခဲ့ပါတယ် အမေ။
တခါတလေကျတော့လည်း ဒီခေတ်မှာ လူငယ်ဖြစ်နေတာ တန်ရဲ့လားလို့ တွေးမိပါတယ်။
ပတ်ဝန်းကျင်က သားနဲ့ရွယ်တူ လူငယ်တွေ လုပ်နေကြတာတွေကို သားက မလုပ်ဘူးတာတွေများလို့လေ အမေ။
သူငယ်ချင်းတွေ သူတို့ကောင်မလေးတွေနဲ့ သွားတာ လာတာတွေ မြင်ပြန်တော့လည်း အားကျမိပြန်ရော အမေ။
ဒါပေမယ့် သေချာစဉ်းစားကြည့်တော့ သားလုပ်နေရတာတွေကို သားကျေနပ်ပါတယ်။ ဘာဖြစ်လို့လဲ ဆိုတော့ အမေ့ ကျေးဇူးတွေကို တခြားဟာတွေနဲ့ မဆပ်နိုင်ရင်တောင် အမေ့ စကားကို နားထောင်နိုင်လို့လေ။
အခုတော့ သားက အမေကို မေ့ပြီး Online မှာ Blog လုပ်လိုက် Chatting လုပ်လိုက်နဲ့ လုပ်နေပါတယ် အမေ။
Online ကလူတွေက Online တက်လာတဲ့သူတိုင်း လူလိမ်၊ လူညာလို့ပဲ ထင်နေကြလား မသိဘူး အမေ။
သားက ရိုးရိုးသားသား အမှန်တွေကို ပြောတာကို လိမ်ညာတယ်လို့ ယူဆကြတယ်ထင်တယ် အမေ။
တချို့ က ကိုယ်ကိုကို အမှန်တရားကို မြတ်နိုးတယ်။ အမှန်ကိုပဲပြောတယ်၊ ပွင့်ပွင့်လင်းလင်း ရင်ထဲမှာ ရှိတဲ့ အတိုင်းပြောတတ်တယ်လို့ ပြောပေမယ့် လည်း တကယ်တန်းတော့ သူတို့ လည်း မှားရင် မှားတဲ့အကြောင်းကို ပွင့်ပွင့်လင်းလင်း မပြောကြပါဘူး အမေ။
သားကလည်း သားရဲ့ အမှားကို ထောက်ပြခဲ့ရင် မှားတယ်လို့ လက်ခံမှာ ပါ မှားခဲ့တာကိုလည်း တောင်းပန်မှာပါ အမေ။
Online မှာ မလိမ်မိအောင် ကြိုးစားပါတယ်။ အမှန်ကို မပြောချင်ရင်တောင် ညာတော့ မညာချင်ဘူး အမေ။
အိမ်မှာ အငယ်ဆုံးလည်း ဖြစ်ပြန်၊ အမေကလည်း အားလုံးထက် ပိုပြီး ဦးစားပေးထားတော့ သားက Online မှာလည်း ဦးစားပေးခံချင်တာ အမေ။
တချို့ တွေကို ဆို သားက တကယ်ခင်မိ၊ သံယောဇဉ် ရှိမိတာပါ အမေ။
ဒါပေမယ့်အမေ သူတို့က သားကို Online ပေါ်မှာ အပျော်ပဲဖြစ်ဖြစ်၊ လိမ်တာညာတာတွေပဲဖြစ်ဖြစ်၊ မဟုတ်က ဟုတ်က လျှောက်ပြောနေတဲ့သူ တယောက်လို့ပဲမြင်နေကြတယ် အမေ။
သားအပေါ်မှာလည်း အမေလို ဦးစားပေးမှုမျိုး မရှိခဲ့ပါဘူး အမေ။
ဒါကလည်း သားမှားတာပါ အမေ သားက သူတို့ကို အမေ့လို၊ အကို အမတွေလိုမျိုး ခင်မိသွားပြီး ဆိုးချင်မိတာလေ။
တကယ်တော့ သူတို့က သားရဲ့ မိသားစု မှ မဟုတ်တာနော် အမေ။
သူတို့မှာလည်း အပြစ်မရှိပါဘူးနော်။ သားကိုက ခံစားမှုလွန်ကဲသွားလို့ပါ အမေ။
သားက သူများတွေလို ကြုံသလို၊ တွေ့သလို အပေါ်ယံတွေ မပြောတတ်တာ ခက်တယ်နော် အမေ။
သားနားလည်ပါပြီ။ အမေ့ကို မေ့ပြီး သူတို့နဲ့ တနေကုန် Chatting လုပ်ခဲ့တဲ့ အပြစ်တွေကြောင့် သား စိတ်ပင်ပန်းခဲ့ရတာပါနော်။
ခုတော့ ဒါတွေ လျှော့လိုက်ပါပြီ အမေ။ သားအမေ့ စကားကိုနားထောင်ပြီး စာလုပ်ပါ့မယ့်၊ ဘုရားစာလည်းရွတ်ပါ့မယ် အမေ။
အမေ့ အပေါ်မှာ မှားခဲ့တာ ရှိခဲ့ရင်လည်း ခွင်လွှတ်ပေးပါလို့ ရှိခိုးဦးချပြီး တောင်းပန်ပါတယ် အမေ။
ခွင့်လွှတ်မယ်လို့လည်း ယုံကြည်ပါတယ်။ သားအပေါ်မှာ ယုံကြည်မှုရှိပြီး၊ နားလည်တတ်တာက အမေ လောက် ဘယ်သူမှ မပိုဘူးဆိုတာ သားသိလို့ပါ အမေ။
သူများပြောတာထက် သားပြောတာကို ပိုယုံကြည်ပေးလို့ အမေကို ကျေးဇူးတင်ပါတယ် အမေ။
သားအပေါ်မှာ အမေ ကောင်းခဲ့တာတွေ၊ ပေးဆပ်ခဲ့ရတာတွေ၊ ပင်ပန်းခဲ့တာတွေကို တွေးမိရင် သားမျက်ရည်ကျမိပါတယ် အမေ။
အမေ့ကို လွမ်းလှပြီ အမေ။
ကျောင်းမြန်မြန်ပြီးအောင် စာကြိုးစားလုပ်ပြီး အမေရှိတဲ့ရွာကို သားပြန်လာခဲ့တော့မယ် အမေ။
မှတ်ချက်။ ။ ကျွန်တော့်ရင်ထဲက စကားများကို အမေ့ထံသို့ပြောပြချင်းမျှသာ

Read More...(ဆက်လက်ဖတ်ရန်)

မြန်မာစံတော်ချိန်

Calendar


Recent Comments